Амьдрал жинхэнэ хайр дээр тогтдог

        Зүгээр л байсан зүрх сэтгэлийг
        Яаж чи ингэж өөрчилж чадав аа?
гэдэг дуу өглөө сонсчихсон чинь аялагдаад салдаггүй ээ. Гэснээс нээрээ би энэ сэдвээр бичнэ гэж өмнөх нэг бичлэг дээрээ ам алдсаншд.
Нэлээн олон хосоос анзаарсан нэг зүйл бол эр хүн хайртай бүсгүйтэйгээ хамт байхдаа тэр бүсгүйнхээ төлөө өөрчлөгдөж чаддаг бол эмэгтэй хүн өөртөө таалагддаг залуугаар хайрлуулж, хамтдаа байхдаа хамгаас илүү жаргалтай байдаг юм шиг санагдсан. Хүний амьдралд маш олон учралууд заяадаг ч жинхэнэ хайр ганцхан заяагддаг юм шигээ... Тэр ганцхан заяагддаг жинхэнэ хайртайгаа азтай нэг нь эрт учраад нэг насандаа жаргадаг бол азгүй нэг нь насандаа ч учирдаггүй юм шиг... Харин азтай ч юм шиг, азгүй ч юм шиг нөхдүүд оройтож учирдаг ч юм шиг ккк.
Нэг найз маань олон залуусын хайрыг булааж явсан хөөрхөн бүсгүй бий. Гэхдээ нөхөртэйгөө хамт байхдаа тийм ч жаргалтай байгаагүй. Нялх хүүхэдтэй нөхрөөсөө салаад нэг хэсэг нэлээн зовсон. Тэгж байгаад нэлээн хүүхэмсэг нэгэн залуутай учирчихав. Залууг нь би сайн мэддэг байсан учир тийм ч таатай хүлээж аваагүй. Тэр залуугийн олон учралуудын нэг нь болоод л өнгөрөх байх гэж бодож байсан. Гэвч... Одоо 7 жил болчихлоо. Энэ хугацаанд хүлээн зөвшөөрөхөөс аргагүй зүйлийг би олж харсан. Хоёр биендээ арай дэндүү хайртай. Тэр залуугийн манай найзад хандаж байгаа хандлага, харж байгаа харц, тавьж байгаа анхаарал халамж үнэхээр өөр, бүр үг бүр нь, үйлдэл бүр нь чин сэтгэлээсээ. Манай найз түүнтэй учирсанаас хойш бас л өөр болсон дөө. "Хүнээр хайрлуулах, хүнийг хайрлах гэдэг чинь л хамгийн аз жаргалтай болгодог зүйл байна, жинхэнэ хайр хүнийг өөдрөг болгодог учраас хүн тэр чинээгээр өөдөлж дэвжиж, сэтгэл санаагаа дагаад ажил үйлс ч бүтэмжтэй, бүх юм сайхан болдог юм байна" гэж ярьдаг юм одоо. Гайхмаар нь тэр хүүхэмсэг залуу одоо тийм биш кк. Жинхэнэ хайр хүмүүнийг хүмүүжүүлдэг бололтой. Эсвэл хүн жинхэнэ хайраа хайгаад олон учралтай тохиолддог юм болов уу? За за мэдэхгүй цус...
Дээрх найзын маань нэг ангид сурч байсан бас нэг бүсгүй 2 хүүхэдтэй, нэлээн шаггүй бизнесмэн нөхөртэй элэг бүтэн амьдралтай байж байгаад нэг л өдөр нөхөртөө хөөгдөөд бараг л гудамжинд гарсан гэнэ. Нөхөр, хүүхдүүддээ дэндүү халамжтай нэгэн байж. Нөхөр нь хангалттай мөнгө олдог байсан учраас ажил хийдэггүй, гэрийн ажлаа хийгээд нөхөр хүүхдүүдийнхээ хоол ундыг хийгээд, хувцас хунарыг угааж цэвэрлээд ар гэрийнхээ асуудлыг бүрэн хариуцаад явдаг байж л дээ. Харамсалтай нь нөхөр нь тэр хайр халамжийг даагаагүй, мөнгөтэй чадалтай учраас маш олон хүүхнүүдтэй орооцолддог, явдалтай нэгэн байсан гэнэ. Тэр болгоныг нь тэвчдэг, тэр битгий хэл өөр хүүхэнтэй буудалд согтуу байна, машинаа барьж чадахгүй нь гэхэд нь очиж авдаг хүлцэнгүй нэгэн байсан гэж байгаа юм даа. Нөхөр нь нэг л өдөр өөр бүсгүйд хайртай болсон гээд хөөгөөд явуулсан байгаа юм. Би найзаараа дамжуулаад эчнээ танил болохоор яг тэр үеийг нь сайн мэддэг юм. Маш их стресст орсон хүн аягүй сонин юм байналээшд. Нэг удаа тааралдаад мэндэлсэн чинь намайг танихгүй "хэн билээ?" гэж гайхаад... Яг тэр үед над руу харсан харц нь хэт ядарсан, бүүр сэтгэлээр унасан шинжтэй байсан юм. Дараа нь найздаа тэр тухай хэлсэн чинь нөхрөөсөө салаад маш их стресстэй байгаа гэж хэлээд би учрыг нь ойлгосон л доо. Цаг хугацаа бүхнийг эмчилдэг хойно... Одоо бол тэр үе мартагдаад, тэр бүсгүй шал өөр болсон л доо хэвэндээ ороод. Сонирхолтой нь нөхөртэй нь суусан бүсгүй жинхэнэ хайр нь байсан байх, эхнэрээ хөөгөөд явуулсан залуу өөрчлөгдөөд төрөл арилжсан гэсэн. Үзэл бодол нь, амьдралын хэв маяг нь одоо шал өөр гэсэн. Их зөв залуу болсон юм байх. Өөрийнхөө бурууг ойлгоод экс эхнэртээ 2 өрөө байр авч өгөөд, бүрэн тохижуулж өгсөн гэнэ. Хоёр хүүхдийнхээ бүх асуудлыг шийддэг, тэр битгий хэл гэртээ хоолоо хийдэг, гэрийн ажлаа хийлцэж эхнэртээ тусладаг халамжтай, хүмүүжилтэй гэрийн эзэн болсон байна гэнэшд. Нөгөө хүүхэмсэг залуу бас л хүмүүжлийн замаар замначихсан ккк.
За за цааш нь бичихээс залхуу хүрчихлээ. Ер нь ингээд бодохоор цаанаасаа заяагдсан тавилан, арга билгийн зохицол гэж үнэхээр байдаг байх гэж хүлээн зөвшөөрөхөөс аргагүй тохиолдлууд энэ амьдралд зөндөө л байна дөө.