Нет, не мигрень...

Толгой өвдөөд байх юмаа. Өглөө сэрэнгүүт л толгой өвдөж босож ирсэн. Одоо болтол намддаггүй. Хэтэрхий стрессдсэн л дээ өчигдрөөс хойш, үгүй ээ бараг уржигдраас хойш...

Зээ дүү дунд сургуулиа төгсөөд конкурс өгч байгаа. Хүний урманд нэг удаа хичээл хийсэнгүй. Бараг сүүлийн 2-3 жил хичээлээ хий гэж үглэлээ, гуйлаа, аргадлаа, загналаа. Би лав дийлэхгүй юм байна. Өөрийнх нь төлөө санаа зовж байна гэж огт бодохгүй үнэн гомдмоор. 

Уржигдар орой гараад гэрийн доор байдаг ПС рүү ороод алга болчихсон. Гэртээ ор гэж хэлэх гээд залгасан, утсаа авсангүй. Хичнээн ч удаа залгав. Шөнийн 12 цаг өнгөрөөгөөд орж ирж байгаа юм даа. Тэгээд өдөр унтчихсан болохоор нойр хүрэхгүй байна гээд телевиз үзээд суучих юм. Маргааш шалгалттай унтаачээ гэхээр тоохгүй, яагаад ийм тэнэг юм бэ? Тэгээд үр дүнд нь өглөө унтаад нэг шалгалтнаас хоцорчихсон. Би сэрүүлгээ тавиад унтсан хэрнээ л сэрүүлгээ ч сонсолгүй нам унтчихаж. Одоо тэгээд тэр хүүхдийн сургууль соёл өнгөрч байгаа юмуу бүү мэд. Огт хичээл хийдэггүй байж улсын шалгалтаа 75-95% өгчихсөн гэж байгаа. Би багш нар нь худлаа дүн тавьдаг юм болов уу гээд гайхаад байгаа. 

Хүний хүүхэд хүрэн бөөртэй гэж юутай үнэн үг вэ? Өнчин өрөөсөн гэдгийг нь мэдрүүлэхгүй л өсгөсөн. Хамаг залуу насаа хүний хүүхдийн төлөө зориулсан. Хахаж цацсан тансаг амьдралыг үзүүлээгүй ч гэсэн хэнээс ч дутахгүй л өдий зэрэгт хүргэсэн. Өөрийн хүүхэд биш болохоор хатуу үг ч хэлж болдоггүй юм байна. Загнаж үглэлээ гээд улам цаашлана. Аясаар нь байхаар улам даварна. Өөрийнх нь төлөө үг хэлж байна гэж одоо лав ойлгох цаг нь болоогүй байгаа юм шиг байна. Магад миний насан дээр ирэхээрээ л намайг хэн байсныг ойлгох байх. 

Хэний хүчинд өдий зэрэгтэй явж байгаагаа ойлгох ухаан юутай ч энэ хүүхдэд алга. Өчигдөр орой "би хүүхдийг чинь харж өгч чадахгүй" гээд хаалга саваад гараад явсан. Гомдмоор. Орой гомдоод баахан уйллаа. Тэрнээс болоод одоо болтол толгой өвдөөд байх шиг байна. Нет, не мигрень, но подай карандашик ментоловый гэдэг шүлгийн мөр толгойд эргэлдээд байна.

Охины цэцэрлэг энэ сар дуустал ажиллахаа больсон гэнээ. 2-хон хүүхэд л явна гэсэн, тэгэхээр ажиллах боломжгүй гэж байна. Одоо хүүхэд харах хүнгүй яанаа... Эмээ өвөөтэй ч болоосой. Аав ээж 2 амьд байсан бол миний охиныг гараасаа ч тавихгүй өсгөөд өгөх байсан даа.

Одоо 2 сар л тэсчихвэл... 8 сарын 15-наас амралтаа авна гэсэн төлөвлөгөөтэй байгаа. 9 сараас охиноо улсын цэцэрлэгт оруулж, цэцэрлэгийн төлбөрөөс чөлөөлөгдөж нэг санаа амарна. Төрийн санд ажилладаг нэг найздаа намраас охины цэцэрлэгийн асуудлыг шийдэж өгөөрэй гээд хэлчихсэн. Манай ажилтай ойрхон цэцэрлэгт гээд давраад байгаа юмаа бас. Ам бардам ОК гэсэн. Болох байхаа. Угаасаа миний охины асуудал өөрөө л шийдэгдээд байдаг юм чинь...